’کیا واقعی کوئی ساتھ رہنا نہیں چاہتا؟‘، تنہا رہنے کے بیان پر سلمان خان کی وضاحت

ممبئی: بالی ووڈ کے دبنگ سپر اسٹار سلمان خان نے سوشل میڈیا پر اپنی تنہائی سے متعلق وائرل ہونے والے مبہم بیان پر خاموشی توڑتے ہوئے واضح کیا ہے کہ ان کے الفاظ کو غلط رنگ دیا گیا اور وہ دراصل اپنی ذات کے بارے میں بات نہیں کر رہے تھے۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری اپنے ایک وضاحتی اور دلچسپ پیغام میں سلمان خان نے لکھا کہ وہ اکیلے کیسے ہو سکتے ہیں جب ان کے پاس اتنا بڑا خاندان اور مخلص دوست موجود ہیں؟ انہوں نے کہا کہ وہ خود کو کبھی تنہا نہیں سمجھ سکتے کیونکہ کروڑوں مداحوں کی دعائیں اور بے پناہ محبت ہمیشہ ان کے ساتھ ہیں، اور وہ اتنی نعمتوں کے ہوتے ہوئے خود کو کبھی ناشکرا نہیں پا سکتے۔

اداکار نے اپنے روایتی مزاحیہ انداز کو برقرار رکھتے ہوئے مزید لکھا کہ “کبھی کبھی وہ لوگوں کے ہجوم سے تھک جاتے ہیں، اسی لیے کچھ وقت خاموشی اختیار کرنا چاہتے ہیں، لیکن ان کے اس عام سے بیان کو ’بریکنگ نیوز‘ بنا دیا گیا”۔ انہوں نے ہلکے پھلکے انداز میں انکشاف کیا کہ اب تو ان کی والدہ بھی پریشان ہو کر پوچھ رہی ہیں کہ آخر ہوا کیا ہے؟ اس لیے سب کو اب پرسکون ہو جانا چاہیے۔

یاد رہے کہ یہ تنازع اس وقت کھڑا ہوا تھا جب سلمان خان نے اپنی ایک تصویر کے ساتھ اکیلے رہنے اور تنہائی کے فرق پر ایک گہری اور مبہم پوسٹ شیئر کی تھی، جس میں لکھا تھا کہ اکیلا رہنا ایک انتخاب ہے جبکہ تنہائی وہ کیفیت ہے جب کوئی آپ کے ساتھ نہ ہو۔ اس پوسٹ کے بعد دنیا بھر میں موجود ان کے مداحوں میں تشویش کی لہر دوڑ گئی تھی اور مختلف قیاس آرائیاں کی جا رہی تھیں، تاہم اب اداکار کی اس وضاحت نے تمام افواہوں پر فل اسٹاپ لگا دیا ہے۔