ایران امریکا جنگ کے باعث اپریل میں پاکستان کا خام تیل کا درآمدی بل تاریخی بلند ترین سطح پر

کراچی: ایران اور امریکا کے درمیان جاری جنگ کے نتیجے میں عالمی منڈی میں خام تیل کی قیمتوں کو پر لگ گئے ہیں، جس نے پاکستان کے لیے ایک نئے معاشی خطرے کی گھنٹی بجا دی ہے۔ ماہرینِ معیشت اس صورتحال کو 2008ء کی عالمی کساد بازاری اور 2022ء کی روس یوکرین جنگ کے بعد ملکی معیشت کے لیے تیسرا بڑا تزویراتی دھچکا قرار دے رہے ہیں۔ اسٹیٹ بینک آف پاکستان کی جانب سے جاری کردہ تازہ ترین اعداد و شمار کے مطابق، رواں سال اپریل (2026ء) میں پاکستان کا خام تیل کا درآمدی بل ملکی تاریخ کی بلند ترین سطح 96 کروڑ 40 لاکھ ڈالر ریکارڈ کیا گیا ہے۔

مرکزی بینک کے مطابق، اپریل 2026ء میں پیٹرولیم مصنوعات کا مجموعی درآمدی بل 1 ارب 80 کروڑ ڈالر تک پہنچ گیا ہے، جو ملکی تاریخ کی چھٹی بلند ترین سطح ہے۔ اس کے برعکس، اسی ماہ کے دوران ملک میں ایل این جی (LNG) کی درآمدات صفر رہیں۔ دوسری جانب، معاشی ماہرین نے خبردار کیا ہے کہ پیٹرولیم مصنوعات کے درآمدی بل میں اس ہوشربا اضافے کے باعث ملک کے تجارتی خسارے میں شدید اضافے کا خدشہ ہے، جس کے براہِ راست نتیجے میں آنے والے دنوں میں پاکستانی روپے پر دباؤ مزید بڑھ سکتا ہے۔