قومی مشن کا دوسرا روز: ملک کے 79 مخصوص اضلاع میں انسدادِ پولیو مہم تیزی سے جاری

اسلام آباد: نیشنل ایمرجنسی آپریشنز سینٹر (EOC) کے مطابق ملک کے 79 مخصوص اضلاع میں انسدادِ پولیو کی خصوصی مہم کا دوسرا روز کامیابی سے جاری ہے۔ 18 سے 24 مئی تک جاری رہنے والی اس سات روزہ مہم کے پہلے ہی روز 56 لاکھ 83 ہزار سے زائد بچوں کو پولیو سے بچاؤ کے قطرے پلائے جا چکے ہیں۔ اس ملک گیر مہم کے دوران مجموعی طور پر تقریباً 1 کروڑ 90 لاکھ بچوں کو ویکسین پلانے کا ہدف مقرر کیا گیا ہے، جس کے لیے 1 لاکھ 63 ہزار پولیو ورکرز گھر گھر جا کر بچوں کو معذوری سے محفوظ بنانے کے اس عظیم مشن میں مصروفِ عمل ہیں۔

صوبائی اعداد و شمار کے مطابق مہم کے پہلے روز سندھ میں سب سے زیادہ یعنی تقریباً 18 لاکھ 95 ہزار بچوں کی ویکسینیشن کی گئی، جبکہ پنجاب میں 17 لاکھ 8 ہزار، خیبر پختونخوا میں 14 لاکھ 19 ہزار، بلوچستان میں 5 لاکھ 20 ہزار اور وفاقی دارالحکومت اسلام آباد میں 1 لاکھ 40 ہزار سے زائد بچوں کو پولیو سے بچاؤ کے قطرے پلائے جا چکے ہیں۔ نیشنل ای او سی نے عوام کو خبردار کیا ہے کہ پولیو ایک لاعلاج بیماری ہے جو بچوں کو زندگی بھر کے لیے معذور کر سکتی ہے، اس لیے والدین اپنے بچوں کے محفوظ مستقبل کے لیے پولیو ورکرز کے لیے اپنے دروازے کھولیں اور انہیں یہ قطرے لازمی پلَوائیں۔