تمام خدمات ایک پلیٹ فارم پر، نادرا کی جدید ویب سائٹ متعارف

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کی سہولت کے لیے اپنی جدید ویب سائٹ متعارف کرا دی ہے، جس کا مقصد شناختی خدمات کو مزید منظم اور صارف دوست بنانا ہے۔ اب شناختی کارڈ (CNIC)، نائیکوپ (NICOP)، پی او سی اور ایف آر سی سمیت تمام خدمات کو ایک ہی ڈیجیٹل پلیٹ فارم پر یکجا کر دیا گیا ہے۔

اس نئی ویب سائٹ کی سب سے اہم خصوصیت ‘nGRIDS’ سسٹم ہے، جہاں رجسٹریشن ڈیٹا اور اعدادوشمار نقشوں کی صورت میں دستیاب ہیں۔ یہ سسٹم ضلعی سطح پر مردم شماری اور رجسٹریشن کا تقابلی جائزہ فراہم کرتا ہے، جو تحقیقی سرگرمیوں اور حکومتی منصوبہ بندی میں معاون ثابت ہوگا۔ اس کے علاوہ، پیدائش، وفات، شادی اور طلاق کی رجسٹریشن کے مربوط نظام کے ساتھ ساتھ بینکاری، ٹیلی کام اور دیگر اداروں کے لیے تصدیقی خدمات کو بھی ایک جگہ جمع کر دیا گیا ہے۔

نادرا نے اپنے کیریئر پورٹل اور شکایات کے ازالے کے نظام کو بھی اپ گریڈ کیا ہے، جبکہ کال سینٹر اور ای میل سپورٹ کو مزید مؤثر بنایا گیا ہے۔ اب صارفین ملک بھر میں موجود رجسٹریشن مراکز اور موبائل رجسٹریشن وینز کی مکمل معلومات اور لوکیشنز آسانی سے حاصل کر سکتے ہیں۔ ویب سائٹ پر ‘رائٹ ٹو انفارمیشن’ اور میڈیا سینٹر کے سیکشنز کو بھی جدید خطوط پر استوار کیا گیا ہے تاکہ شفافیت اور معلومات تک رسائی کو یقینی بنایا جا سکے۔