طوفانی بارشیں، بادل پھٹنے سے مختلف علاقوں میں سیلابی صورتحال، لینڈسلائیڈنگ سے 4 مزدور جاں بحق

ملک بھر میں جاری مون سون کی طوفانی بارشوں اور بادل پھٹنے کے باعث ندی نالوں میں طغیانی اور تباہ کن سیلابی صورتحال پیدا ہو گئی ہے۔ خیبر، مانسہرہ، وادی نیلم، لیہ، حسن ابدال اور نگر سمیت مختلف علاقوں میں شدید نقصان کی اطلاعات ہیں۔ ضلع نگر کے علاقے بڈہ لس میں لینڈ سلائیڈنگ سے 4 مزدور جاں بحق اور 3 زخمی ہو گئے، جبکہ خیبر میں گاڑیوں کے سیلابی ریلے میں بہنے سے 3 افراد لاپتہ ہو گئے۔ وادی نیلم اور مانسہرہ کے علاقے جبوڑی میں کلاؤڈ برسٹ سے متعدد مکانات، ہوٹل، دکانیں اور گاڑیاں بہہ گئیں اور مرکزی شاہراہ نیلم پر ٹریفک معطل ہو گئی۔ لیہ میں دریائے سندھ کے کٹاؤ کے باعث 2 سرکاری اسکول، 3 مساجد اور 300 سے زائد مکانات دریا برد ہو گئے، جبکہ ہیڈ قادر آباد کے مقام پر دریائے چناب میں 1 لاکھ 38 ہزار کیوسک کی آمد سے نچلے درجے کا سیلاب ریکارڈ کیا گیا ہے۔ انتظامیہ نے وادی کاغان اور کنہار کے حساس علاقوں میں سیاحوں اور مقامی آبادی کو آبی گزرگاہوں سے دور رہنے کی سخت ہدایت جاری کی ہے۔