حوثیوں نے بحیرہ احمر میں آبنائے باب المندب بند کرنے پر غور شروع کر دیا

یمن کی تسلیم شدہ حکومت نے خبردار کیا ہے کہ ایران کی حمایت یافتہ حوثی ملیشیا نے عالمی تجارتی شاہراہ بحیرہ احمر میں واقع اہم آبنائے باب المندب کو مکمل طور پر بند کرنے کے منصوبے پر غور شروع کر دیا ہے۔

یمن کے وزیر اطلاعات نے اپنے ایک بیان میں انکشاف کیا کہ حوثی عسکریت پسند ساحلی علاقوں اور بحیرہ احمر میں واقع اہم یمنی جزائر پر اپنا کنٹرول اور عسکری موجودگی مسلسل بڑھا رہے ہیں تاکہ آبنائے باب المندب کی ناکہ بندی کے لیے حالات سازگار بنائے جا سکیں۔ انہوں نے مزید کہا کہ حوثیوں کی جانب سے حالیہ دنوں میں فوجی تیاریوں میں نمایاں اضافہ کیا گیا ہے، جبکہ بندرگاہوں، شہری تنصیبات، تجارتی بحری جہازوں اور حکومتی بحری صلاحیتوں کو بار بار نشانہ بنانا اسی خطرناک منصوبے کا حصہ ہے۔