مقبوضہ مغربی کنارے یہودی آبادکاری منصوبہ، برطانیہ کا اسرائیل سے شدید احتجاج

برطانوی وزیر خارجہ ایڈ ملی بینڈ نے مقبوضہ مغربی کنارے میں بڑے پیمانے پر نئی یہودی آبادکاری کے منصوبے کے لیے ٹینڈر جاری کرنے پر اسرائیلی ناظم الامور کو برطانیہ کی وزارتِ خارجہ طلب کر کے شدید احتجاج درج کروایا ہے۔

ایک باضابطہ بیان میں برطانوی وزیر خارجہ ایڈ ملی بینڈ نے اسرائیلی اقدام کو مکمل طور پر ناقابلِ قبول اور تباہ کن قرار دیتے ہوئے کہا کہ یہ منصوبہ فلسطین کے مرکزی علاقے کو تقسیم کر دے گا اور مغربی کنارے کو مشرقی بیت المقدس سے الگ کرنے کا سنگین خطرہ پیدا کرتا ہے، جس سے ‘دو ریاستی حل’ کے امکانات کو ناقابلِ تلافی نقصان پہنچے گا۔

برطانیہ نے اس معاملے کو اسرائیلی وزیر خارجہ کے سامنے بھی باضابطہ طور پر اٹھایا ہے اور مطالبہ کیا ہے کہ اسرائیل فوری طور پر اس متنازع منصوبے کو روکے، غیر قانونی آبادکاری یونٹس کا جاری کردہ ٹینڈر واپس لے اور تمام آبادکاریوں میں توسیع کا سلسلہ بند کرے۔ ایڈ ملی بینڈ کا مزید کہنا تھا کہ اسرائیل نے وعدے کی خلاف ورزی کرتے ہوئے یہ ٹینڈر جاری کیا ہے، جبکہ ان افراد کو بھی مطلع نہیں کیا گیا جنہوں نے اس اقدام کو عدالت میں چیلنج کر رکھا تھا۔ انہوں نے واضح کیا کہ اسرائیلی آبادکاروں کا تشدد فلسطینیوں کی مشکلات بڑھا رہا ہے اور برطانیہ دو ریاستی حل کی تباہی کا تماشا خاموشی سے نہیں دیکھے گا۔