موساد سربراہ کا شامی وزیر خارجہ سے رابطہ، شام میں ترک فوج کی موجودگی پر گفتگو

اسرائیلی خفیہ ایجنسی موساد کے سربراہ رومان گوفمان نے شامی وزیر خارجہ اسعد الشیبانی سے ٹیلی فون پر رابطہ کر کے شام میں ترکیہ کی بڑھتی ہوئی فوجی موجودگی اور سرگرمیوں پر تفصیلی تبادلہ خیال کیا ہے۔

خبر ایجنسی کے مطابق، یہ اہم ٹیلی فونک رابطہ شام میں اسرائیلی فضائی حملوں سے قبل 14 اگست کو ہوا تھا۔ گفتگو کے دوران ترکیہ کی جانب سے شام میں اپنی فوج کی تعیناتی، جدید اسلحے اور ڈرونز کی فراہمی سمیت دیگر فوجی منصوبوں پر بحث کی گئی۔ اسرائیل نے شامی حکومت کو ترکیہ کے بڑھتے ہوئے عسکری اثر و رسوخ پر شدید تشویش سے آگاہ کرتے ہوئے خبردار بھی کیا۔

اس رابطے کے بعد 18 اگست کو اسرائیل نے شمالی شام کے ابوالظہور ایئربیس پر شدید فضائی حملے کیے تھے۔ اس سے قبل اسرائیلی وزیراعظم بنیامین نیتن یاہو نے بھی اپنے بیان میں واضح کیا تھا کہ اسرائیل، شام میں ترکیہ کی ایسی کسی بھی فوجی موجودگی کو ہرگز برداشت نہیں کرے گا جو اس کے لیے سیکیورٹی خطرہ بن سکتی ہو۔