راشد منہاس شہید کا 55واں یوم شہادت، افواجِ پاکستان کا زبردست خراج عقیدت

پاک فضائیہ کے دلیر اور کم عمر ترین ہیرو، پائلٹ افسر راشد منہاس شہید (نشانِ حیدر) کے 55ویں یومِ شہادت کے موقع پر پاکستان کی مسلح افواج اور پوری قوم نے انہیں وطنِ عزیز کے دفاع میں عظیم اور بے مثال قربانی دینے پر شاندار الفاظ میں خراجِ عقیدت پیش کیا ہے۔

آئی ایس پی آر کے ترجمان کے مطابق چیف آف ڈیفنس فورسز و آرمی چیف فیلڈ مارشل سید عاصم منیر، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو سمیت تمام مسلح افواج نے اس بے باک سپوت کی لازوال شجاعت کو سلام پیش کیا۔

پاک فوج کے ترجمان ادارے نے یاد دہانی کروائی کہ 20 اگست 1971ء کے تاریخی روز پائلٹ افسر راشد منہاس شہید نے غیر معمولی چیلنج کا مقابلہ کرتے ہوئے پاک فضائیہ اور ملک کی آن بان پر حرف نہ آنے دیا۔ انہوں نے پاکستان کی خودمختاری اور دفاع کے لیے اپنی جان کا نذرانہ پیش کر کے فرض شناسی، پختہ عزم اور بے لوث شجاعت کی وہ درخشندہ مثال قائم کی جسے تاریخ میں ہمیشہ سنہرے حروف سے یاد رکھا جائے گا۔ پاک افواج اور قوم نے اس موقع پر وطن کی سالمیت، خودمختاری اور قومی مفادات کے تحفظ کے اپنے غیر متزلزل عزم کا اعادہ بھی کیا۔