20 جولائی سے اب تک 48 سعودی تیل بردار بحری جہازوں کو روکا گیا، حوثی گروپ کا دعویٰ

یمن کے حوثی باغیوں نے دعویٰ کیا ہے کہ انہوں نے 20 جولائی سے اب تک 48 سعودی تیل بردار بحری جہازوں کو سمندری راستے سے گزرنے سے روکا ہے، جبکہ 8 سعودی تیل بردار جہازوں کو کامیابی سے نشانہ بنایا ہے۔

ایرانی میڈیا کے مطابق، حوثی فورسز کے ملٹری ترجمان یحییٰ سریع نے تفصیلات بتاتے ہوئے کہا کہ حوثی جنگجوؤں نے بحیرہ احمر میں 5، جبکہ خلیجِ عدن اور بحیرہ عرب میں 3 سعودی آئل ٹینکرز پر حملہ کیا۔ ترجمان نے مزید دعویٰ کیا کہ اس کے علاوہ سعودی عرب کے علاقوں ینبع، نجران، جازان، ابہا اور مشرقی صوبے میں قائم اہم تیل کی تنصیبات کے خلاف 9 بڑی عسکری کارروائیاں بھی کی گئی ہیں۔