شہزادہ ہیری کا رواں ماہ فیملی سمیت امریکا سے برطانیہ واپس آنے کا فیصلہ

برطانوی شاہی خاندان سے وابستہ رہنے والے شہزادہ ہیری اور ان کی اہلیہ میگھن مارکل نے امریکہ میں 6 سالہ قیام کے بعد رواں ماہ واپس برطانیہ منتقل ہونے کا حتمی فیصلہ کر لیا ہے۔

خبر ایجنسی کے مطابق دونوں نے اپنے بچوں کو برطانیہ کے ایک اسکول میں داخل کروا دیا ہے جہاں ستمبر سے ان کا تعلیمی سیشن شروع ہو جائے گا۔ شہزادہ ہیری نے اپنے والد کنگ چارلس کو اپنے اس فیصلے اور برطانیہ میں مستقل قیام کے منصوبے سے باقاعدہ آگاہ کر دیا ہے۔ یاد رہے کہ ہیری اور میگھن کے بیٹے آرچی کی عمر 7 سال اور بیٹی لیلی بٹ کی عمر 5 سال ہے۔

میڈیا رپورٹس کے مطابق برطانیہ واپسی کے باوجود یہ جوڑا دوبارہ رسمی شاہی فرائض سرانجام نہیں دے گا۔ واضح رہے کہ دونوں نے جنوری 2020ء میں اعلیٰ شاہی عہدوں سے دستبرداری کا اعلان کرتے ہوئے میگھن کی آبائی امریکی ریاست کیلیفورنیا میں سکونت اختیار کر لی تھی اور مختلف انٹرویوز میں شاہی خاندان کے ساتھ اپنے اختلافات کو علانیہ بیان کیا تھا۔