محسن نقوی سے امریکی سفیر کی ملاقات، مذاکرات کے دوسرے راؤنڈ پر تبادلہ خیال

وفاقی وزیر داخلہ محسن نقوی سے امریکی سفیر نیٹلی بیکر نے اہم ملاقات کی ہے جس میں خطے کی مجموعی سیکیورٹی صورتحال اور اسلام آباد مذاکرات کے دوسرے راؤنڈ کے انعقاد پر تفصیلی تبادلہ خیال کیا گیا۔ ملاقات میں سفارتی ذرائع سے تنازعات کے دیرپا حل اور باہمی تعاون کے تسلسل کی ضرورت پر زور دیا گیا۔

وزیر داخلہ محسن نقوی نے اس موقع پر امریکی صدر ڈونلڈ ٹرمپ کی جانب سے جنگ بندی میں توسیع کے اقدام کو سراہتے ہوئے اسے کشیدگی میں کمی کے لیے ایک بڑی پیش رفت قرار دیا۔ انہوں نے امید ظاہر کی کہ ایران کی جانب سے بھی اس سلسلے میں مثبت ردعمل سامنے آئے گا۔ محسن نقوی کا مزید کہنا تھا کہ وزیراعظم شہباز شریف اور فیلڈ مارشل جنرل عاصم منیر امن کے قیام کے لیے ہر سطح پر متحرک ہیں اور فریقین کو سفارتی حل کے مواقع فراہم کرنے کے لیے پرعزم ہیں۔

امریکی سفیر نیٹلی بیکر نے خطے میں قیامِ امن اور تنازعات کے حل کے لیے پاکستان کے مثبت اور تعمیری کردار کی تعریف کی۔ دونوں شخصیات نے اس بات پر اتفاق کیا کہ پائیدار امن کے لیے سفارتی چینلز کا فعال رہنا ناگزیر ہے۔