پنجاب کے 5 اضلاع میں گرین الیکٹرک بس سروس کا باقاعدہ افتتاح

وزیراعلیٰ پنجاب مریم نواز نے صوبے کے پانچ اضلاع میں ماحول دوست گرین الیکٹرک بس سروس کا باقاعدہ افتتاح کر دیا ہے، جس کے تحت پہلے مرحلے میں لیہ، چنیوٹ، سیالکوٹ، اوکاڑہ اور مری میں بسیں چلائی جائیں گی۔ افتتاحی تقریب سے خطاب کرتے ہوئے انہوں نے اسے پاکستان کی تاریخ کا سب سے بڑا پبلک ٹرانسپورٹ سسٹم قرار دیا اور مری میں پہلی بار الیکٹرک بس سروس شروع کرنے پر مسرت کا اظہار کیا۔ وزیراعلیٰ نے بتایا کہ ان بسوں میں بزرگ شہریوں، خواتین اور طلبہ کے لیے کرایوں میں خصوصی رعایت دی گئی ہے، جبکہ صوبے کے دیگر اضلاع کے لیے مزید 101 نئی الیکٹرک بسیں روانہ کی جا رہی ہیں۔ انہوں نے عزم ظاہر کیا کہ حکومت کا ہدف آئندہ 5 برسوں میں صوبہ بھر میں 5 ہزار الیکٹرک بسیں چلانا ہے تاکہ پنجاب کے عوام کو آرام دہ، محفوظ، ماحولیاتی آلودگی سے پاک اور کم خرچ سفری سہولیات فراہم کی جا سکیں۔