صدرِ مملکت نے وزیراعظم کی سفارش پر 3سمریوں کی منظوری دے دی

صدر مملکت آصف علی زرداری نے وزیراعظم شہباز شریف کی سفارش پر تین اہم سرکاری سمریوں کی منظوری دے دی ہے۔ منظور شدہ سمریوں کے مطابق، صدرِ مملکت نے اقوامِ متحدہ کے اسلاموفوبیا کے انسداد سے متعلق خصوصی ایلچی میگوئل اینجل موراٹینوس (Miguel Ángel Moratinos) کی خدمات کے اعتراف میں انہیں پاکستان کے باوقار سول اعزاز ‘ہلالِ پاکستان’ سے نوازنے کی منظوری دی ہے۔ اس کے علاوہ، صدر زرداری نے لا اینڈ جسٹس کمیشن آف پاکستان کے رکن فضلِ حق عباسی کا استعفیٰ بھی باضابطہ طور پر منظور کر لیا ہے۔ ایک اور اہم تقرری کی منظوری دیتے ہوئے صدرِ مملکت نے ظفر حسن کو وفاقی پبلک سروس کمیشن (FPSC) کا نیا رکن مقرر کرنے کی سمری پر بھی دستخط کر دیے ہیں۔