انسانی پلاسنٹا کی غیر قانونی خرید و فروخت کیس؛ اسلام آباد کی عدالت نےملزمان کی ضمانت کی درخواستوں پر فیصلہ محفوظ

اسلام آباد کی ڈسٹرکٹ اینڈ سیشن کورٹ میں انسانی پلاسنٹا (اول) کی غیر قانونی خرید و فروخت کے کیس میں گرفتار ۴ ملزمان کی ضمانت بعد از گرفتاری کی درخواستوں پر سماعت ہوئی، جس کے بعد عدالت نے فیصلہ محفوظ کر لیا ہے۔ ایڈیشنل ڈسٹرکٹ اینڈ سیشن جج محمد افضل مجوکہ کے روبرو سماعت کے دوران وکلاءِ صفائی اور پراسیکیوشن کے درمیان دلچسپ اور تفصیلی بحث ہوئی۔ ملزمان کے وکلاء نے مؤقف اختیار کیا کہ پلاسنٹا قانوناً انسانی اعضاء میں شمار نہیں ہوتا بلکہ اس کا مثبت طبی استعمال کیا جاتا ہے، جس میں گنج پن کے شکار افراد کے سر پر بال اگوانے کے لیے پلاسنٹا کے ٹشوز کا استعمال بھی شامل ہے۔ اس پر جج افضل مجوکہ نے استفسار کیا کہ “میں نے بھی بال لگوائے ہیں، تو کیا اس میں بھی پلاسنٹا استعمال ہوا ہے؟” جس پر وکیل نے جواب دیا کہ اگر مخصوص طریقہ کار اپنایا گیا ہو تو ۱۰۰ فیصد پلاسنٹا ٹشوز ہی استعمال ہوتے ہیں۔ دوسری جانب، پراسیکیوشن نے ضمانت کی مخالفت کرتے ہوئے دہرایا کہ ملزمان کو جائے وقوعہ سے رنگے ہاتھوں گرفتار کیا گیا اور ان کے قبضے سے ایک ہزار سے زائد انسانی پلاسنٹا برآمد ہوئے ہیں، لہٰذا میڈیکل ایکسپرٹس کی رپورٹ کی روشنی میں ملزمان کی ضمانتیں مسترد کی جائیں۔