الیکشن کمیشن کا عام انتخابات سے قبل انتخابی قوانین، آئین میں تبدیلیوں کا فیصلہ

الیکشن کمیشن آف پاکستان نے آئندہ عام انتخابات کو مزید شفاف اور مؤثر بنانے کے لیے انتخابی قوانین اور آئینی شقوں میں بڑی تبدیلیاں لانے کا فیصلہ کرتے ہوئے اپنی لیگل ریفارمز کمیٹی کو فعال کر دیا ہے۔ الیکشن کمیشن کے اعلیٰ حکام اور تمام ونگز کے نمائندوں پر مشتمل یہ کمیٹی عام انتخابات 2024 کے دوران سامنے آنے والی قانونی و آئینی خامیوں کا تفصیلی جائزہ لے گی۔ ذرائع کے مطابق، کمیٹی الیکشن ایکٹ 2017، الیکشن رولز 2017 اور متعلقہ آئینی شقوں کو جدید اور وقت کے تقاضوں کے مطابق ڈھالنے کے لیے ضروری ترامیم کی تجاویز تیار کرے گی۔ قوانین اور قواعد کا یہ جائزہ رواں برس دسمبر تک مکمل کر لیا جائے گا، جس کے بعد الیکشن کمیشن نئی قانون سازی پر تین ماہ کے اندر اپنی حتمی رائے دے کر متعلقہ فورمز کو باقاعدہ سفارشات ارسال کرے گا۔