لیبیا کے قریب تارکین وطن کی کشتی الٹنے سے 50 اموات کا خدشہ

لیبیا کے مشرقی ساحلی شہر طبرق کے نزدیک جزیرہ بردعہ کے قریب یورپ جانے کی کوشش کرنے والے تارکینِ وطن کی کشتی الٹنے سے خواتین اور بچوں سمیت کم از کم 50 افراد ہلاک یا لاپتہ ہو گئے ہیں۔ مشرقی لیبین کوسٹ گارڈز کے مطابق، حادثے کا شکار ہونے والی غیر محفوظ کشتی پر تقریباً 60 افراد سوار تھے، جن میں سے محض 10 افراد تیر کر جزیرے تک پہنچنے اور اپنی جان بچانے میں کامیاب ہو سکے، جبکہ باقی لاپتہ افراد کی تلاش کے لیے سرچ آپریشن جاری ہے۔ واضح رہے کہ 2011 میں معمر قذافی کے اقتدار کے خاتمے کے بعد سے لیبیا شدید بدامنی کا شکار ہے، تاہم یہ ملک افریقہ اور مشرقِ وسطیٰ کے جنگ زدہ اور غریب علاقوں سے فرار ہونے والوں کے لیے بحیرہ روم کے راستے یورپ پہنچنے کا سب سے بڑا گڑھ بن چکا ہے۔ بین الاقوامی ادارہ برائے مہاجرین (IOM) کے مطابق، انسانی سمگلروں کی جانب سے ناکارہ کشتیوں کے استعمال کے باعث صرف رواں سال اب تک سینکڑوں اور گزشتہ برس 1,300 سے زائد افراد اس خطرناک سمندری راستے کی نذر ہو چکے ہیں۔