پاکستان سٹاک مارکیٹ میں تیزی، ایک لاکھ 77 ہزار پوائنٹس کی حد بحال

پاکستان اسٹاک ایکسچینج (پی ایس ایکس) میں تیزی کا سفر مسلسل دوسرے روز بھی جاری ہے، جہاں کاروباری ہفتے کے چوتھے روز (جمعرات کو) ٹریڈنگ کے آغاز پر ہی زبردست مثبت رجحان دیکھا گیا اور ہنڈرڈ انڈیکس نے 1 لاکھ 77 ہزار پوائنٹس کی اہم حد بحال کر لی ہے۔ مارکیٹ میں انویسٹرز کے شاندار اعتماد کے باعث کے ایس ای (KSE-100) انڈیکس 2,000 سے زائد پوائنٹس کی بڑی چھلانگ لگا کر 1 لاکھ 77 ہزار 354 پوائنٹس کی سطح پر پہنچ گیا۔ واضح رہے کہ گزشتہ کاروباری روز اسٹاک مارکیٹ میں بڑی بحالی ریکارڈ کی گئی تھی اور ہنڈرڈ انڈیکس 1 لاکھ 75 ہزار 285 پوائنٹس کی سطح پر بند ہوا تھا، جس کے بعد آج بھی مارکیٹ نے اپنی اوپر کی جانب اڑان کو برقرار رکھا ہے۔