ڈاکٹر آکاش قتل کیس؛ پولیس نے لڑکی سمیت 3 ملزمان کو مفرور قرار دے دیا

کراچی کی سٹی کورٹ میں جوڈیشل مجسٹریٹ جنوبی کی عدالت کے روبرو ڈاکٹر آکاش قتل کیس میں پولیس نے اہم تفتیشی رپورٹ جمع کرا دی ہے، جس کی کاپی تھری سکس فائیو نیوز نے حاصل کر لی ہے۔ رپورٹ کے مطابق، پولیس نے قتل کے اس ہائی پروفائل کیس میں ایک لڑکی سمیت تین ملزمان کو مفرور قرار دیتے ہوئے اعتراف کیا ہے کہ مقتول ڈاکٹر آکاش سے چھینی گئی ۲۰ لاکھ روپے کی رقم تاحال برآمد نہیں کی جا سکی۔ رپورٹ میں انکشاف کیا گیا ہے کہ گرفتار ملزمان سریش، رام چند اور انیل کو ابتدائی طور پر اسلحہ ایکٹ کے تحت حراست میں لیا گیا تھا، تاہم تفتیش کے دوران انہوں نے ڈاکٹر آکاش کو لوٹنے اور قتل کرنے کا اعتراف کر لیا۔ ملزمان نے انکشاف کیا کہ انہوں نے مفرور ساتھیوں کے ہمراہ کلفٹن تین تلوار کے قریب بینک سے رقم نکلوا کر آنے والے شخص سے رقم چھینی تو وہاں موجود سیکیورٹی گارڈ نے ان پر فائرنگ کر دی، جس کے جواب میں انہوں نے بھی جوابی فائرنگ کی اور فرار ہو گئے۔ بعد میں انہیں معلوم ہوا کہ ان کی فائرنگ سے ایک شخص جاں بحق ہو گیا ہے۔ پولیس کا کہنا ہے کہ ملزمان انتہائی خطرناک اور عادی جرائم پیشہ ہیں جن کی شناخت پریڈ کرانا اور دیگر مقدمات میں انٹروگیشن کرنا ابھی باقی ہے، جبکہ مفرور ملزمان اسلم پنہور، ایک لڑکی اور ایک نامعلوم موٹے شخص کی گرفتاری اور چھینی گئی رقم کی برآمدگی کے لیے کوششیں جاری ہیں۔