آبنائے ہرمز سرخ لکیر، خطے میں امریکی تنصیبات تباہ کر دیں گے: ایرانی افواج

ایران کے خاتم الانبیا مرکزی ہیڈکوارٹر کے ترجمان بریگیڈیئر جنرل ابراہیم ذوالفقاری نے امریکہ کو سخت وارننگ دیتے ہوئے کہا ہے کہ اگر امریکی افواج نے ایرانی انفراسٹرکچر کو نشانہ بنانے کی کوشش کی، تو خطے میں موجود تمام اہم امریکی تنصیبات کو تباہ کر دیا جائے گا۔ انہوں نے دوٹوک الفاظ میں واضح کیا کہ جارحیت کی صورت میں خطے کا انفراسٹرکچر بھی ایرانی مسلح افواج کا نشانہ بنے گا اور اسے اس طرح نیست و نابود کیا جائے گا جیسے اس کا کبھی وجود ہی نہیں تھا۔ ترجمان نے آبنائے ہرمز (Strait of Hormuz) کو ایران کی ناقابلِ عبور سرخ لکیر قرار دیتے ہوئے کہا کہ امریکہ کو اس حساس آبی گزرگاہ میں مداخلت کی کسی صورت اجازت نہیں دی جائے گی۔ دوسری جانب، ایران کے فوجی ترجمان محمد اکرمینیا نے متنبہ کیا ہے کہ مسلسل امریکی عسکری کارروائیوں کے نتیجے میں جنگ نئے محاذوں تک پھیل سکتی ہے، اور ایران نے ابھی تک اپنی مکمل عسکری صلاحیتوں کا مظاہرہ نہیں کیا۔ انہوں نے واضح کیا کہ تہران کا اپنے ہمسایہ ممالک یا اسلامی ریاستوں سے تصادم کا کوئی ارادہ نہیں ہے اور وہ علاقائی برادرانہ تعلقات کے خواہاں ہیں، تاہم ملکی سلامتی اور وقار کے تحفظ کے لیے دشمن کو ایسا جواب دیا جائے گا جو اس کے وہم و گمان سے بھی باہر ہوگا۔