پنجاب حکومت خوابوں کی تعبیر تک نوجوانوں کا ساتھ دے گی: مریم نواز

وزیراعلیٰ پنجاب مریم نواز شریف نے عارف والا میں “نواز شریف اسکول آف ایمیننس” کے ۱۰ اسکولوں کا باقاعدہ افتتاح کرتے ہوئے اعلان کیا ہے کہ پنجاب حکومت صوبے کے ہونہار اور مستحق طلبہ کے لیے مزید ۵۰ ہزار اسکالرشپس اور ایک لاکھ جدید لیپ ٹاپس تقسیم کرے گی۔ تقریب سے خطاب کرتے ہوئے انہوں نے واضح کیا کہ وسائل کی کمی کو کسی بھی باصلاحیت نوجوان کی تعلیم کی راہ میں رکاوٹ نہیں بننے دیا جائے گا، اور حکومت صوبے بھر کے سرکاری اسکولوں کو ۴۰ ارب روپے کی خطیر لاگت سے تمام بنیادی و جدید تعلیمی سہولیات سے آراستہ کر رہی ہے۔ مریم نواز نے کہا کہ پہلی بار سرکاری اسکولوں میں سائنس، ریاضی اور آئی ٹی کے ساتھ ساتھ مصنوعی ذہانت (AI)، مشین لرننگ اور روبوٹکس کی جدید ترین لیبز قائم کی جا رہی ہیں۔ انہوں نے صوبے کے ۱۳ کروڑ عوام اور طلبہ کی جان و مال کے تحفظ کو اولین ترجیح قرار دیتے ہوئے مقتدر حکام کو کھلے مین ہول فوری بند کرنے کی سخت ہدایات جاری کیں اور بارشوں کے موسم میں والدین کو بچوں کی حفاظت یقینی بنانے کی تاکید کی۔ ان کا کہنا تھا کہ پنجاب میں تعلیم کے شعبے میں انقلابی تبدیلی کا آغاز ہو چکا ہے اور جلد ہی صوبے بھر میں ۳۰۰ جدید اسکول قائم کیے جائیں گے۔