میٹا کا نیا اے آئی پیٹنٹ موت کے بعد بھی صارف کو زندہ رکھے گا

واشنگٹن: ٹیکنالوجی کمپنی میٹا نے ایک ایسا پیٹنٹ حاصل کیا ہے جو کسی صارف کی غیر موجودگی یا وفات کے بعد بھی اس کی سوشل میڈیا سرگرمی کو بحال رکھ سکتا ہے۔

مغربی میڈیا کے مطابق یہ نظام بڑے لینگویج ماڈل (LLM) کی بنیاد پر کام کرے گا اور صارف کے ماضی کے رویّے، پوسٹس، کمنٹس اور دیگر سرگرمیوں کی بنیاد پر آن لائن موجودگی کو سمولیٹ کرے گا۔پیٹنٹ میں بتایا گیا ہے کہ اگر صارف طویل عرصے تک پلیٹ فارم سے دور رہے یا وفات پا جائے، تو یہ نظام:

• اس کی جانب سے پوسٹس، لائکس اور کمنٹس تیار کر سکتا ہے۔

• ڈائریکٹ میسجز کے جوابات بھی تیار کیے جا سکتے ہیں۔

• ویڈیو یا آڈیو کالز کی نقل کے لیے بھی استعمال ہو سکتا ہے، جس سے ڈیجیٹل موجودگی حقیقت کے قریب ہو جاتی ہے۔

پیٹنٹ کے مرکزی مصنف اینڈریو بوسورتھ ہیں۔ یہ نظام صارف کے مخصوص ڈیٹا جیسے پرانی پوسٹس، تبصرے اور انگیجمنٹ ہسٹری پر انحصار کرے گا تاکہ اندازہ لگایا جا سکے کہ وہ عام طور پر کس طرح ردعمل دیتے تھے۔میٹا نے واضح کیا ہے کہ فی الحال کمپنی کے پاس اس ٹیکنالوجی کو تجارتی بنیادوں پر متعارف کرانے کا کوئی منصوبہ نہیں ہے۔ماہرین نے اس ٹیکنالوجی کے قانونی، اخلاقی اور نفسیاتی پہلوؤں پر تشویش ظاہر کی ہے۔ برطانیہ کی یونیورسٹی آف برمنگھم سے وابستہ ڈیجیٹل حقوق اور بعد از وفات رازداری کی ماہر پروفیسر ایڈینا ہاربنجا کے مطابق یہ معاملہ پیچیدہ قانونی اور فلسفیانہ سوالات پیدا کرتا ہے جن پر سنجیدہ غور و فکر ضروری ہے۔