غیر ملکی ہیکرز کا سی ڈی اے پر بڑا سائبر حملہ؛ اسلام آبادیوں کا ٹیکس و بلنگ ڈیٹا ہیک، بحالی کے لیے ایک ماہ کی مہلت

وفاقی دارالحکومت میں غیر ملکی ہیکرز کی جانب سے شہریوں کا حساس ڈیٹا ہیک کرنے کا ایک بڑا اور تشویشناک معاملہ سامنے آیا ہے۔ ہیکرز نے کیپیٹل ڈیولپمنٹ اتھارٹی (CDA) کے ریونیو سسٹم پر سائبر حملہ کر کے شہریوں کے پراپرٹی بلز، ٹیکسوں کی ادائیگی اور ریونیو کا اہم ڈیٹا ہیک کر لیا ہے۔

اس سائبر ہیکنگ کے باعث اسلام آباد کے شہریوں کو بلز اور ٹیکسز کی آن لائن ادائیگیوں میں شدید مشکلات کا سامنا کرنا پڑ رہا ہے۔ شہریوں کی جانب سے ادائیگیاں رک جانے کی وجہ سے سی ڈی اے کے مجموعی ریونیو (آمدن) میں بھی واضح کمی ریکارڈ کی گئی ہے۔ صورتحال کی سنگینی کو دیکھتے ہوئے سی ڈی اے حکام نے شہریوں کو بڑی ریلیف دیتے ہوئے بغیر کسی جرمانے (Surcharge) کے ٹیکس اور بل جمع کرانے کے لیے ایک ماہ کی اضافی مہلت دے دی ہے۔

ذرائع کے مطابق، سی ڈی اے کی ٹیکنیکل اور آئی ٹی ٹیم گزشتہ 10 روز سے متحرک ہونے کے باوجود اب تک مکمل ڈیٹا ریکوری کو یقینی نہیں بنا سکی ہے۔ ٹیکنیکل ٹیم نے ابتدائی طور پر ہیکنگ سے محفوظ رہنے والے ڈیٹا کو سکیور (محفوظ) کیا اور اس کے بعد ریکوری کا باقاعدہ آپریشن شروع کیا۔

سی ڈی اے حکام کا کہنا ہے کہ انتھک کوششوں کے بعد اب تک 80 فیصد ڈیٹا کامیابی سے ریکور کیا جا چکا ہے۔ حکام نے امید ظاہر کی ہے کہ رواں ہفتے کے دوران ہی باقی ماندہ ڈیٹا بھی مکمل طور پر ریکور کر لیا جائے گا، جس کے فوراً بعد شہریوں کے لیے آن لائن ادائیگی کا پورٹل بحال کر دیا جائے گا۔