امریکا: چار ریاستوں کا میٹا کیخلاف مقدمہ، 1400 ارب ڈالر کے تاریخی جرمانے کا امکان

امریکہ کی چار ریاستوں کیلیفورنیا، کولوراڈو، کینٹکی اور نیو جرسی—نے میٹا پلیٹ فارمز پر سنگین الزام عائد کیا ہے کہ اس نے فیس بک اور انسٹاگرام کو جان بوجھ کر اس انداز میں تیار کیا ہے کہ نوجوان صارفین ان کے عادی (نشے کی حد تک) بن جائیں، جبکہ ان پلیٹ فارمز کی حفاظت سے متعلق عوام کو گمراہ کیا گیا۔ میٹا کی حالیہ عدالتی درخواست کے مطابق، ان ریاستوں کی جانب سے تجویز کردہ ممکنہ جرمانہ 1400 ارب ڈالر (1.4 ٹریلین ڈالرز) تک پہنچ سکتا ہے، جو کمپنی کی مجموعی مارکیٹ ویلیو (تقریباً 1500 ارب ڈالر) کے برابر ہے۔ دوسری جانب، میٹا نے ان تمام الزامات کو یکسر مسترد کرتے ہوئے مؤقف اختیار کیا ہے کہ یہ مجوزہ جرمانہ شواہد سے مطابقت نہیں رکھتا اور صارفین کے تحفظ کے قوانین کی تاریخ میں اتنی بڑی سزا کی کوئی مثال نہیں ملتی۔ واضح رہے کہ اس کیس کا باقاعدہ مقدمہ رواں سال اگست میں اوکلینڈ کی عدالت میں شروع ہوگا۔