نصیر آباد میں 12 سالہ گھریلو ملازمہ مبینہ تشدد سے جاں بحق، قتل کا مقدمہ درج

لاہور کے علاقے نصیر آباد میں مبینہ تشدد کے بعد 12 سالہ گھریلو ملازمہ کنیز فاطمہ جاں بحق ہو گئی ہے۔ پولیس نے بچی کے والد جاوید کی مدعیت میں کوٹھی مالکان کے خلاف قتل کی دفعات کے تحت مقدمہ درج کر کے باقاعدہ تحقیقات کا آغاز کر دیا ہے۔ پولیس ریکارڈ کے مطابق، افسوسناک واقعے کا شکار ہونے والی کنیز فاطمہ فیصل آباد کی رہائشی تھی اور گزشتہ ایک ماہ سے نصیر آباد میں صوفی اعجاز نامی شخص کے گھر پر گھریلو ملازمہ کے طور پر کام کر رہی تھی۔

درج کروائی گئی ایف آئی آر کے مطابق، مقتولہ کے والد جاوید نے بتایا کہ انہیں مالک کی بہو نے فون کر کے فوری لاہور پہنچنے کا کہا۔ جب وہ اپنی اہلیہ اور بھائی کے ہمراہ لاہور کے گلاب دیوی ہسپتال پہنچے تو ڈاکٹروں نے انکشاف کیا کہ بچی کو مردہ حالت میں ہسپتال لایا گیا تھا۔ والد نے مقدمے میں سنگین الزام عائد کیا ہے کہ کوٹھی مالکان نے ان کی 12 سالہ معصوم بیٹی پر بے پناہ تشدد کیا، جس کے باعث اس کی موت واقع ہوئی۔ پولیس نے لاش کو پوسٹ مارٹم کے لیے مردہ خانے منتقل کر دیا ہے اور حکام کا کہنا ہے کہ موت کی اصل اور حتمی وجہ پوسٹ مارٹم رپورٹ کے بعد ہی سامنے آئے گی، تاہم ملزمان کی گرفتاری کے لیے تفتیش تیز کر دی گئی ہے۔