بے قابو 22 ویلر ٹریلر سڑک کنارے بیٹھے مزدوروں پر الٹ گیا، 2مزور جان بحق

صوبہ پنجاب کے مختلف اضلاع میں پیش آنے والے دو الگ الگ ٹریفک حادثات میں 2 افراد جاں بحق اور ایک شدید زخمی ہو گیا۔ پہلا حادثہ ضلع بہاولنگر میں ہارون آباد روڈ پر شہباز والا کے قریب پیش آیا، جہاں بجری سے بھرا ایک تیز رفتار 22 ویلر ٹریلر بے قابو ہو کر سڑک کنارے بیٹھے 2 مزدوروں پر الٹ گیا۔ ریسکیو حکام کے مطابق حادثے کے نتیجے میں ایک مزدور موقع پر ہی جاں بحق ہو گیا جبکہ دوسرا شدید زخمی ہوا، جسے ابتدائی طبی امداد کے بعد فوری طور پر اسپتال منتقل کر دیا گیا۔ پولیس نے بتایا کہ جاں بحق ہونے والے مزدور کی شناخت محمد شوکت کے نام سے ہوئی ہے۔

دوسری جانب، شیخوپورہ کی تحصیل صفدر آباد میں کچی کوٹھی کے قریب ایک اور جان لیوا حادثہ رونما ہوا، جہاں ایک تیز رفتار منی ٹرک سڑک پر کھڑے 22 وہیلر ٹرک سے جا ٹکرایا۔ ریسکیو ذرائع کے مطابق یہ ٹکر اس قدر شدید تھی کہ منی ٹرک کا اگلا حصہ تباہ ہو گیا اور اس میں سوار شخص کی لاش گاڑی کے ملبے میں پھنس گئی، جسے ریسکیو اہلکاروں نے گاڑی کے حصے کاٹ کر باہر نکالا۔ پولیس کے مطابق جاں بحق ہونے والے 26 سالہ نوجوان کی شناخت محمد ماجد کے نام سے ہوئی ہے، جس کا تعلق ٹوبہ ٹیک سنگھ سے تھا۔ دونوں حادثات کے بعد متعلقہ پولیس نے کارروائی کا آغاز کر دیا ہے۔