حکومت نے پیٹرول پر عائد لیوی میں بڑا اضافہ کر دیا، شرح 80 روپے فی لیٹر تک پہنچ گئی

حکومت نے پیٹرول کی قیمتوں میں اضافے کے بعد پیٹرول پر عائد پیٹرولیم لیوی کی شرح میں بھی 9 روپے 64 پیسے فی لیٹر کا بڑا اضافہ کر دیا ہے۔ ذرائع کے مطابق، اس اضافے کے بعد پیٹرول پر عائد پیٹرولیم لیوی کی شرح ایک بار پھر 80 روپے فی لیٹر کی بلند ترین سطح تک پہنچ گئی ہے، جبکہ اس سے قبل یہ شرح 70 روپے 36 پیسے فی لیٹر تھی۔ ذرائع کا کہنا ہے کہ پیٹرولیم لیوی میں اس اضافے کے باعث عوام پر مالی بوجھ مزید بڑھنے کا خدشہ ہے کیونکہ یہ لیوی پیٹرولیم مصنوعات کی مجموعی قیمت پر براہِ راست اثر انداز ہوتی ہے۔ واضح رہے کہ حکومت نے آج ہی پیٹرول کی فی لیٹر قیمت میں 13 روپے 18 پیسے جبکہ ڈیزل کی قیمت میں 13 روپے 80 پیسے کا بھاری اضافہ کیا ہے، جس کے بعد پیٹرول کی نئی قیمت 310 روپے 71 پیسے اور ڈیزل کی نئی قیمت 323 روپے 30 پیسے فی لیٹر مقرر کر دی گئی ہے۔