پاکستان سمیت دنیا بھر میں آج نرسنگ ڈے منایا جارہا ہے

دنیا بھر کی طرح آج پاکستان میں بھی نرسوں کا عالمی دن منایا جا رہا ہے، جس کا مقصد نرسنگ کے شعبے کی اہمیت کو اجاگر کرنا اور انسانیت کی خدمت میں مصروف نرسز کی بے لوث خدمات کو خراجِ تحسین پیش کرنا ہے۔ شعبہ صحت میں نرسنگ کو ریڑھ کی ہڈی کی حیثیت حاصل ہے، تاہم پاکستان میں یہ شعبہ اس وقت افرادی قوت کی شدید کمی کا شکار ہے۔انٹرنیشنل کونسل آف نرسز کے زیرِ اہتمام یہ دن ہر سال 12 مئی کو جدید نرسنگ کی بانی فلورنس نائٹن گیل کے یومِ پیدائش کی مناسبت سے منایا جاتا ہے۔ اس دن کو باقاعدہ منانے کا آغاز 1965 میں ہوا تھا۔ پاکستان میں نرسنگ کے شعبے کی بنیاد 1949 میں بیگم رعنا لیاقت علی خان نے رکھی تھی، جس نے ملک میں خواتین کے لیے اس معزز پیشے کے راستے کھولے۔ مختلف طبی رپورٹس کے مطابق پاکستان کو اس وقت مجموعی طور پر تقریباً 15 لاکھ نرسوں کی کمی کا سامنا ہے۔ ایک تشویشناک اندازے کے مطابق ملک میں 100 مریضوں کی دیکھ بھال کے لیے صرف ایک نرس دستیاب ہے، جو بین الاقوامی معیار کے مقابلے میں انتہائی کم ہے۔ ملک میں اس وقت 162 نرسنگ ادارے کام کر رہے ہیں، لیکن آبادی کی بڑھتی ہوئی ضروریات کے پیشِ نظر یہ تعداد ناکافی ہے۔ نرسیں طویل ڈیوٹی اوقات، محدود سہولیات اور شدید ذہنی و جسمانی دباؤ کے باوجود فرنٹ لائن پر اپنی ذمہ داریاں نبھا رہی ہیں۔کورونا وائرس کی عالمی وبا کے دوران نرسوں نے اپنی جانوں کی پروا کیے بغیر جس طرح مریضوں کی خدمت کی، اسے عالمی سطح پر سراہا گیا۔ ماہرینِ صحت کا کہنا ہے کہ جب تک نرسنگ کے شعبے میں سرمایہ کاری اور نرسوں کے معاشی و سماجی حالات بہتر نہیں کیے جاتے، تب تک ملک میں صحت کے اہداف کا حصول مشکل رہے گا۔