پیٹرول بحران کے باعث بینک ملازم نے سواری کا انوکھا طریقہ اختیار کر لیا

دیواس (بھارت): ایندھن کے بحران نے جہاں عام زندگی کو مفلوج کر دیا ہے، وہیں کچھ لوگ اس کا دلچسپ حل بھی نکال رہے ہیں۔ بھارتی شہر دیواس میں پیٹرول پمپس پر لگی میلوں لمبی قطاروں اور پیٹرول کی عدم دستیابی نے ایک بینک ملازم گوال ٹھاکر کو غیر روایتی قدم اٹھانے پر مجبور کر دیا۔

گوال ٹھاکر، جو روزانہ اپنی موٹر سائیکل پر دفتر جاتے تھے، پیٹرول نہ ملنے کے باعث وقت پر ڈیوٹی پہنچنے کے لیے پریشان تھے۔ انہوں نے موٹر سائیکل کے متبادل کے طور پر گھوڑے کا انتخاب کیا اور اسے چلا کر سڑکوں کے درمیان سے ہوتے ہوئے اپنے بینک پہنچ گئے۔ وائرل ویڈیو میں انہیں باقاعدہ آفس بیگ لٹکائے گھوڑے پر سوار دیکھا جا سکتا ہے، جس نے راہگیروں کو بھی حیران کر دیا۔

سوشل میڈیا پر اس واقعے نے نئی بحث چھیڑ دی ہے۔ صارفین کی بڑی تعداد نے اسے موجودہ دور کے ایندھن بحران کی سنگین عکاسی قرار دیا ہے، جبکہ کچھ نے اسے ایک “ایکو فرینڈلی” اور عملی حل کہہ کر سراہا ہے۔ گوال ٹھاکر کا کہنا ہے کہ پیٹرول کی قلت نے نقل و حرکت ناممکن بنا دی تھی، اس لیے انہوں نے یہ طریقہ اپنایا تاکہ ان کی پیشہ ورانہ ذمہ داریوں میں رکاوٹ نہ آئے۔