سیف گیمز کے کامیاب انعقاد کیلئے اسپورٹس انفراسٹرکچر کی اپ گریڈیشن کا بڑا فیصلہ

اسلام آباد: پاکستان میں ساؤتھ ایشین فیڈریشن (سیف) گیمز کے کامیاب اور عالمی معیار کے مطابق انعقاد کے لیے اسپورٹس انفراسٹرکچر کی بڑے پیمانے پر اپ گریڈیشن کا فیصلہ کیا گیا ہے، جس کے تحت سینٹرل ڈویلپمنٹ ورکنگ پارٹی (CDWP) نے 5.7 ارب روپے کے خصوصی پیکیج کی منظوری دے دی ہے۔ وفاقی سیکرٹری برائے بین الصوبائی رابطہ (IPC) محی الدین احمد وانی کے مطابق اس منصوبے کا بنیادی مقصد پاکستان اسپورٹس کمپلیکس اسلام آباد سمیت ملک کے دیگر شہروں میں موجود کھیلوں کے مراکز کی سہولیات، معیار اور استعداد کو بین الاقوامی معیار کے مطابق بہتر بنانا ہے۔ انہوں نے اسے سیف گیمز کی میزبانی کی جانب ایک اہم پیش رفت قرار دیتے ہوئے کہا کہ تمام مجوزہ ترقیاتی منصوبوں پر بروقت عملدرآمد اور شفاف تکمیل کو یقینی بنایا جائے گا، جبکہ اپ گریڈ شدہ یہ جدید اسپورٹس کمپلیکس گیمز کے اختتام کے بعد بھی قومی کھلاڑیوں کی بہترین تربیت اور تیاری کے لیے کارآمد ثابت ہوں گے۔ وزارت آئی پی سی کے مطابق اس قومی منصوبے کو تمام متعلقہ اداروں کے ساتھ مل کر باہمی اشتراکِ عمل سے مکمل کیا جائے گا۔