بھارت: طالبہ نے سونا چُرا کر بوائے فرینڈ کو بائیک دلائی، تحفہ ملتے ہی لڑکا فرار

کوئمبتور: بھارتی ریاست تامل ناڈو میں محبت کا ایک انوکھا واقعہ سامنے آیا ہے جہاں 19 سالہ کالج طالبہ پر الزام ہے کہ اس نے اپنے بوائے فرینڈ کے لیے مہنگی موٹر سائیکل خریدنے کی خاطر اپنی دوست کے گھر سے سونے کے زیورات چوری کرلیے۔

پولیس کے مطابق بی کام کی طالبہ آر جوائے پرنسی اپنی دوست کے گھر گئی، جہاں اس نے مبینہ طور پر 9 سوورن سونے کے زیورات چوری کیے۔

رپورٹس کے مطابق طالبہ نے چوری کیے گئے زیورات فروخت کیے، جن سے حاصل ہونے والی تقریباً ڈھائی لاکھ بھارتی روپے کی رقم سے اپنے بوائے فرینڈ کے لیے موٹر سائیکل خریدی۔

زیورات چوری ہونے کا علم ہونے پر دوست کے والد نے پولیس سے رابطہ کیا۔ پولیس کا کہنا ہے کہ تفتیش کے دوران طالبہ نے زیورات چوری کرنے، انہیں فروخت کرنے اور حاصل شدہ رقم سے موٹر سائیکل خریدنے کا اعتراف کیا۔

واقعے میں دلچسپ موڑ اس وقت آیا جب موٹر سائیکل ملنے کے بعد بوائے فرینڈ مبینہ طور پر فرار ہوگیا۔ پولیس کے مطابق اس کی تلاش جاری ہے۔

پولیس کا کہنا ہے کہ واقعے کی مزید تحقیقات جاری ہیں تاکہ چوری، زیورات کی فروخت اور موٹر سائیکل کی خریداری سے متعلق تمام حقائق سامنے لائے جاسکیں۔