آزاد کشمیر کی ترقیاتی ترجیحات کا جائزہ، اسحاق ڈار کی عملدرآمد تیز کرنے کی ہدایت

اسلام آباد: نائب وزیراعظم و وزیر خارجہ سینیٹر اسحاق ڈار کی زیرِ صدارت ایک اہم اعلیٰ سطحی اجلاس منعقد ہوا جس میں آزاد جموں و کشمیر کی ترقیاتی ترجیحات، جاری منصوبوں کی پیشرفت اور ان پر موثر عملدرآمد کا تفصیل سے جائزہ لیا گیا۔

ترجمان دفترِ خارجہ کے مطابق اجلاس کے دوران آزاد کشمیر میں عوامی فلاح و بہبود کے منصوبوں پر طے شدہ وقت کے مطابق عملدرآمد کو یقینی بنانے کے لیے عملی اقدامات پر غوروخوص کیا گیا۔ نائب وزیراعظم اسحاق ڈار نے ہدایت کی کہ زیرِ بحث تمام اقدامات اور ترقیاتی منصوبوں کو جلد از جلد حتمی شکل دے کر عملدرآمد شروع کیا جائے کیونکہ آزاد جموں و کشمیر کے عوام کی خوشحالی اور بنیادی سہولیات کی فراہمی حکومت کی اولین ترجیحات میں شامل ہے۔

اجلاس میں وزیراعظم کے معاونِ خصوصی طارق باجوہ، سیکریٹری امورِ کشمیر و گلگت بلتستان، چیف سیکرٹری آزاد جموں و کشمیر کے علاوہ وفاقی اور آزاد کشمیر حکومت کے اعلیٰ حکام نے شرکت کی۔