سہیل آفریدی نے عمران خان اور بشریٰ بی بی کی آنکھ کا مسئلہ سازش قرار دے دیا

خیبرپختونخوا کے وزیر اعلیٰ سہیل آفریدی نے عمران خان اور ان کی اہلیہ بشریٰ بی بی کی آنکھ کی بیماری کو سوچی سمجھی سازش قرار دیتے ہوئے کہا ہے کہ دونوں کی دائیں آنکھ متاثر ہے۔

عمران خان اسٹیڈیم میں صوبائی اسمبلی کے خصوصی اجلاس میں خطاب کرتے ہوئے وزیر اعلیٰ نے کہا کہ بانی چیئرمین پاکستان تحریک انصاف ایک ہزار دن سے زائد عرصہ جیل میں گزار چکے ہیں اور شدید تکلیف کے باوجود انہوں نے کبھی شکایت نہیں کی۔ انہوں نے الزام عائد کیا کہ اب ان کی اہلیہ کو بھی آنکھ کا مسئلہ لاحق ہو گیا ہے اور انہیں اہل خانہ سے ملنے کی اجازت نہیں دی جا رہی۔

انہوں نے کہا کہ عدالت کے فیصلوں کے باوجود عمران خان سے ملاقات ممکن نہیں بنائی جا رہی، جو جمہوری اصولوں کے منافی ہے۔ ان کا کہنا تھا کہ اگر کسی بھی بڑی سیاسی جماعت کو دیوار سے لگایا جائے گا تو اس کے سنگین نتائج برآمد ہو سکتے ہیں۔

وزیر اعلیٰ نے مزید کہا کہ انہوں نے قانونی راستے اختیار کیے مگر انہیں بند کر دیا گیا، جس کے باعث سیاسی کارکنوں میں تشویش پائی جاتی ہے۔