امریکی خارجہ پالیسی اسرائیل کے تابع نہیں، قومی مفادات مقدم ہیں: جے ڈی وینس

مریکی نائب صدر جے ڈی وینس نے ایک اہم کانفرنس سے خطاب کرتے ہوئے کہا ہے کہ امریکہ کو مشرقِ وسطیٰ میں اپنی خارجہ پالیسی محض کسی دوسرے ملک کی منشا پر چلانے کے بجائے خالصتاً اپنے قومی مفادات کے مطابق طے کرنی چاہیے اور اسے اسرائیل کی پالیسی کے تابع نہیں ہونا چاہیے۔ ان کا کہنا تھا کہ اگرچہ امریکہ اور اسرائیل کے درمیان بالخصوص فوجی ٹیکنالوجی اور انٹیلی جنس کے شعبوں میں ایک اہم اور دیرینہ شراکت داری موجود ہے، تاہم دونوں ممالک کے قومی مفادات ہر معاملے میں ایک جیسے یا یکساں نہیں ہو سکتے۔

امریکی نائب صدر نے واضح کیا کہ واشنگٹن صرف ان معاملات اور نکات پر اسرائیل کے ساتھ تعاون جاری رکھے گا جہاں دونوں ممالک کے مشترکہ مفادات وابستہ ہوں گے، لیکن جہاں دونوں فریقین کے مابین اختلافِ رائے پیدا ہوگا، وہاں امریکہ اپنی خارجہ پالیسی کا تعین خود کرے گا۔ انہوں نے اپنے اس موقف کی وضاحت کرتے ہوئے نیٹو (NATO) اتحادیوں کی مثال دی اور کہا کہ یورپی ممالک کے ساتھ مضبوط اتحاد کا ہرگز یہ مطلب نہیں کہ امریکہ اپنی یورپی خارجہ پالیسی کو نیٹو کے تابع کر دے، بالکل اسی اصول کا اطلاق مشرقِ وسطیٰ پر بھی ہونا چاہیے۔

جے ڈی وینس کا یہ اہم بیان ایک ایسے حساس وقت میں سامنے آیا ہے جب امریکہ اور ایران کے درمیان جاری کشیدگی، جنگ کی صورتحال اور مشرقِ وسطیٰ کے مجموعی بحران کے تناظر میں واشنگٹن کے اندر اسرائیل سے متعلق پالیسی پر شدید بحث جاری ہے۔ واضح رہے کہ نائب صدر جے ڈی وینس اس سے قبل بھی اپنے مختلف بیانات میں یہ موقف دہراتے رہے ہیں کہ بعض سٹریٹجک اور عالمی امور میں امریکہ اور اسرائیل کے ترجیحات اور مفادات ایک دوسرے سے مختلف ہو سکتے ہیں۔