پاکستان کا بھارتی بحری جہاز کا خصوصی اقتصادی زون میں خلاف ورزی پر شدید احتجاج

پاکستان نے بھارتی بحری جہاز آئی این ایس کولکتہ (INS Kolkata) کی جانب سے پاکستانی خصوصی اقتصادی زون (EEZ) میں کھلی ورزی اور پاک بحریہ کی جاری مشقوں کے علاقے میں زبردستی داخل ہونے کی کوشش پر نئی دہلی کے سامنے شدید سفارتی احتجاج درج کرایا ہے۔ ترجمان دفترِ خارجہ کے مطابق پاک بحریہ یکم ستمبر سے اپنے اقتصادی زون میں سالانہ ‘سی اسپارک 26’ (SeaSpark 26) بحری مشقیں کر رہی ہے، تاہم 7 ستمبر سے بھارتی بحری جہاز اور اس پر تعینات ہیلی کاپٹر نے مشق کے حساس علاقے میں بلاجواز اور خطرناک حد تک داخل ہونے کی متعدد بار کوششیں کی ہیں۔

دفترِ خارجہ کا کہنا ہے کہ بھارتی بحری جہاز نے پاک بحریہ کے جہازوں کے انتہائی قریب آ کر شدید اشتعال انگیز اور خطرناک انداز اختیار کیا اور تمام تر بحری انتباہات کے باوجود اپنی پیش قدمی جاری رکھی۔ پاکستان نے ان اقدامات کو معمول کی تعیناتی قرار دینے کے بھارتی بیانیے کو سختی سے مسترد کرتے ہوئے اسے 1991ء کے دوطرفہ بحری معاہدوں کی سنگین خلاف ورزی قرار دیا۔ دفترِ خارجہ کے مطابق 15 ستمبر کو آئی این ایس کولکتہ نے انتہائی خطرناک انداز میں رخ تبدیل کیا جس سے اس کی پاکستانی جہاز پی این ایس حنین (PNS Hunain) سے رگڑ ہوئی۔ تاہم، پی این ایس حنین نے پیشہ ورانہ حکمتِ عملی سے بڑے تصادم کو بچایا، جس کے فوری بعد بھارتی جہاز تیز رفتاری سے علاقے سے فرار ہو گیا۔

پاکستانی دفترِ خارجہ نے واقعے کو انتہائی خطرناک اور غیر ذمہ دارانہ قرار دیتے ہوئے کہا کہ پاک بحریہ کے صابرانہ اور پیشہ ورانہ طرزِ عمل نے خطے کو ایک بڑے بحران سے بچا لیا ہے۔ پاکستان نے بھارتی حکام سے مطالبہ کیا ہے کہ وہ حقائق کو مسخ کر کے سفارتی محاذ آرائی سے گریز کریں اور ایسے واقعات کے اعادے کو روکنے کے لیے فوری اور سخت اقدامات کریں۔ واضح رہے کہ بھارت نے الٹا اس واقعے کی ذمہ داری پاکستان پر ڈالتے ہوئے پاکستانی ناظم الامور کو طلب کر کے احتجاج کیا تھا، جس پر پاکستان نے واضح کیا کہ بھارت کا غیر ذمہ دارانہ رویہ علاقائی امن کے لیے شدید خطرہ ہے۔