فیلڈ مارشل عاصم منیر سے امریکی وفد کی ملاقات، خطے کی صورتحال پر گفتگو

پاک فوج کے شعبہ تعلقات عامہ (آئی ایس پی آر) کے مطابق آرمی چیف، چیف آف ڈیفنس فورسز، فیلڈ مارشل سید عاصم منیر سے امریکہ میں قائم معروف کمپنی ‘پاورس’ (PowerS) کے اعلیٰ سطحی وفد نے جنرل ہیڈکوارٹرز (جی ایچ کیو) راولپنڈی میں اہم ملاقات کی۔ اس اہم ملاقات کے دوران دوطرفہ تعلقات، خطے کی مجموعی صورتحال اور باہمی دلچسپی کے مختلف امور سمیت دفاعی ٹیکنالوجی میں بدلتے ہوئے عالمی رجحانات پر تفصیلی تبادلہ خیال کیا گیا۔

آئی ایس پی آر کے مطابق امریکی وفد کی قیادت رابرٹ بریٹ ویلیکویچ نے کی۔ ملاقات کے دوران دفاعی ساز و سامان کی مشترکہ خریداری، مقامی سطح پر تیاری اور عسکری استعداد کار میں مزید اضافہ کرنے جیسے شعبوں میں باہمی تعاون کے عملی امکانات پر بھی غور و خوص کیا گیا۔ فیلڈ مارشل سید عاصم منیر نے قومی سلامتی کے دفاع اور ملکی استعداد و صلاحیتوں کو مستحکم بنانے کے لیے تکنیکی جدت، جدید حل اور جدید ترین دفاعی سسٹمز کے استعمال کی اہمیت پر خاص زور دیا۔

ترجمان پاک فوج کا مزید کہنا تھا کہ ملاقات کے دوران دونوں جانب سے مشترکہ دلچسپی کے تمام شعبوں میں باہمی تعاون، ٹیکنالوجی کی منتقلی اور پیشہ ورانہ روابط کو مزید فروغ دینے اور آگے بڑھانے کی شدید خواہش کا اظہار کیا گیا۔ اس موقع پر دفاعی شعبے میں جدید تکنیکی حل اپنا کر سیکیورٹی کو مزید مضبوط بنانے کے عزم کا اعادہ بھی کیا گیا۔