ایرانی وزارت خارجہ کی جرمن چانسلر پر تنقید، ایران کے خلاف بیانیہ مسترد

ایرانی وزارتِ خارجہ کے ترجمان اسماعیل بقائی نے ایران کے خلاف جارحانہ اور بے بنیاد بیان دینے پر جرمن چانسلر فریڈرک مرز کو سخت تنقید کا نشانہ بنایا ہے۔ اسماعیل بقائی نے اپنے ایک جاری کردہ بیان میں کہا کہ جرمن چانسلر کا ایران پر مسلط کی گئی جنگ، فوجی جوہری پروگرام اور علاقائی اتحادیوں سے متعلق دیا گیا بیانیہ مکمل طور پر گمراہ کن اور حقائق کے برعکس ہے۔ انہوں نے واضح کیا کہ اس جنگ کا آغاز ایران نے نہیں بلکہ امریکہ اور اسرائیل نے خطے میں کھلی جارحیت کر کے کیا۔

ایرانی وزارتِ خارجہ کے ترجمان نے کہا کہ جرمنی نے امریکی اور اسرائیلی کھلی جارحیت کی مذمت کرنے کے لیے معمولی سی اخلاقی جرات کا بھی مظاہرہ نہیں کیا۔ انہوں نے جرمنی کے موقف کو مسترد کرتے ہوئے کہا کہ برلن غنڈہ گردی اور جارحیت کی سرپرستی کرنے کے بعد اب دنیا کو امن اور اخلاقیات کا درس دینے کا کوئی حق نہیں رکھتا، اور نہ ہی جرمنی کو اپنی ناکام پالیسیوں کا بوجھ خطے کے دیگر ممالک پر منتقل کرنا چاہیے۔

اسماعیل بقائی نے مزید وضاحت کرتے ہوئے کہا کہ خطے میں موجود ایران کے تمام اتحادی گروہ مکمل طور پر آزاد اور خودمختار ہیں جو اپنے قومی مقاصد کے لیے جدوجہد کر رہے ہیں۔ انہوں نے اسرائیل کے ان دعوؤں کو یکسر جھوٹ پر مبنی قرار دیا جن میں ایران کے فوجی جوہری پروگرام کا ذکر کیا جاتا ہے، اور اس بات کا اعادہ کیا کہ ایران کا کوئی سویلین مقاصد کے علاوہ مخفی فوجی جوہری پروگرام موجود نہیں ہے۔