ایشین چیمپئنز ٹرافی: پاک بھارت کشیدگی کے باعث پاکستان ہاکی فیڈریشن کا نیوٹرل وینیو کا بڑا مطالبہ

پاکستان ہاکی فیڈریشن (PHF) نے ایشین چیمپئنز ٹرافی میں پاکستان ہاکی ٹیم کی شرکت سے متعلق ایشین ہاکی فیڈریشن کے سامنے ایک بڑا مطالبہ رکھ دیا ہے۔ پاک بھارت کی موجودہ حساس صورتحال اور کشیدگی کے پیشِ نظر پاکستان نے اپنے تمام میچز بھارت سے کسی بھی ‘نیوٹرل وینیو’ (غیر جانبدار مقام) پر منتقل کرنے کا باضابطہ مطالبہ کیا ہے۔ پی ایچ ایف کے مطابق یہ اقدام قومی کھلاڑیوں اور آفیشلز کی حفاظت کو یقینی بنانے کے لیے اٹھایا گیا ہے۔

پاکستان ہاکی فیڈریشن کے ایڈہاک صدر محی الدین وانی نے اپنے ایک اہم بیان میں کہا کہ قومی کھلاڑیوں اور آفیشلز کی سلامتی فیڈریشن کی ہمیشہ اولین ترجیح رہی ہے۔ انہوں نے اس بات پر زور دیا کہ کھلاڑیوں کو ایک محفوظ، باوقار اور کھیل کے لیے سازگار ماحول کی فراہم کے لیے نیوٹرل وینیو کا انتخاب انتہائی ضروری ہے۔ ایڈہاک صدر نے واضح کیا کہ پاکستان ایشین چیمپئنز ٹرافی میں شرکت کے لیے مکمل طور پر پرعزم اور تیار ہے۔

محی الدین وانی نے امید ظاہر کی کہ ایشین ہاکی فیڈریشن پاکستان کی اس معقول اور اصولی تجویز پر مثبت اور بر وقت فیصلہ کرے گی۔ انہوں نے مزید کہا کہ نیوٹرل وینیو کا فیصلہ کر کے ٹورنامنٹ میں پاکستان کی مکمل اور بلا تعطل شرکت کو یقینی بنایا جائے تاکہ کھلاڑی بغیر کسی خوف اور دباؤ کے میدان میں اپنی بہترین صلاحیتوں کا مظاہرہ کر سکیں۔