امریکی نقصانات سے متعلق سامنے آنے والی معلومات آئس برگ کا صرف سرا ہیں: عراقچی

ایرانی وزیرِ خارجہ عباس عراقچی نے امریکہ کے ساتھ جاری تنازعہ کے دوران امریکی افواج کو پہنچنے والے نقصانات سے متعلق بڑا دعویٰ کرتے ہوئے کہا ہے کہ ایران مناسب وقت پر ان تمام تباہ کاریوں کی مزید تفصیلات دنیا کے سامنے لائے گا۔ سوشل میڈیا پلیٹ فارم ایکس (ٹویٹر) پر جاری اپنے ایک بیان میں ایرانی وزیرِ خارجہ نے امریکی حکام کے اس تاثر کو سختی سے مسترد کر دیا کہ ایران ایک بے دفاع ملک ہے اور امریکہ کا مقابلے کی صلاحیت نہیں رکھتا۔

عباس عراقچی نے اپنے موقف کی تائید کے لیے امریکی محکمہِ دفاع (پینٹاگون) کے انسپکٹر جنرل کی ۱۴ ستمبر کو جاری ہونے والی حالیہ رپورٹ کا حوالہ دیتے ہوئے کہا کہ ایران کے جواب میں سینکڑوں امریکی فوجی مقامات کو نقصان پہنچا یا وہ مکمل طور پر تباہ ہوئے، جبکہ درجنوں طیارے بھی متاثر ہوئے ہیں۔ انہوں نے امریکہ کو پہنچنے والے ان انکشافات کو محض ‘آئس برگ کا ایک چھوٹا سا سرا’ قرار دیا اور کہا کہ اصل اور مکمل حقائق ابھی سامنے آنا باقی ہیں جنہیں ایران وقت آنے پر ظاہر کرے گا۔

واضح رہے کہ پینٹاگون کی جاری کردہ رپورٹ کے مطابق ۳۰ جون ۲۰۲۶ء تک مشرقِ وسطیٰ کے متعدد ممالک میں قائم امریکی فوجی اڈوں، سیکڑوں عمارتوں، ڈرونز، اور جنگی طیاروں کو ایرانی حملوں سے شدید نقصان پہنچا ہے۔ رپورٹ میں یہ اعتراف بھی کیا گیا ہے کہ اس جنگ کے دوران امریکی فوجی اخراجات ۳۳.۴ ارب ڈالر تک جا پہنچے ہیں جن میں سے ۲۲ ارب ڈالر کا اسلحہ اور بارود استعمال کیا جا چکا ہے۔ اگرچہ عباس عراقچی کے بعض اضافی دعووں کی مستقل اور آزادانہ طور پر تصدیق نہیں ہو سکی ہے، تاہم ان کے اس بیان نے خطے میں جاری کشیدگی پر مزید بحث چھیڑ دی ہے۔