عمران خان سے کل جیل میں رفقاء کی ملاقات، فہرست جیل حکام کو بھجوا دی گئی

پاکستان تحریک انصاف (پی ٹی آئی) نے بانی پی ٹی آئی سے اڈیالہ جیل میں کل ہونے والی ملاقات کے لیے اپنے مرکزی رہنماؤں اور رفقاء پر مشتمل حتمی فہرست جیل حکام کو بھجوا دی ہے۔ پی ٹی آئی کے باوثوق ذرائع کے مطابق، ارسال کردہ فہرست میں سینیٹر مشتاق احمد خان، کلیم اللہ لونی اور نعیم اسلم گوندل کے نام شامل ہیں۔ تحریک انصاف کے نامزد کردہ تمام رفقاء کل باضابطہ طور پر بانی پی ٹی آئی سے ملاقات کے لیے اڈیالہ جیل پہنچیں گے۔

ذرائع نے مزید بتایا کہ فہرست میں نصیر احمد ستی، محمد بلال انصاری اور شہلا نیازی کے نام بھی شامل کیے گئے ہیں۔ ملاقات کے دوران بانی پی ٹی آئی کے ساتھ پارٹی کے ملکی اور سیاسی امور، درپیش قانونی چیلنجز اور آئندہ کی اسٹریٹ موومنٹ کی حکمتِ عملی پر تفصیلی مشاورت کی جائے گی۔

دوسری جانب، ملاقات کے اس اہم موقع پر راولپنڈی پولیس کی جانب سے سیکیورٹی کے سخت اور جامع انتظامات مکمل کر لیے گئے ہیں۔ پولیس حکام کے مطابق، اڈیالہ جیل کے بیرونی اطراف اور تمام آمدورفت کے اہم راستوں پر سیکیورٹی کے حوالے سے خاص اقدامات کیے جائیں گے اور کسی بھی غیر متعلقہ شخص کو جیل کے قریب جانے کی اجازت نہیں دی جائے گی تاکہ امن و امان کی صورتحال برقرار رکھی جا سکے۔