پیٹرولیم ڈیلرز کا حکومتی ریلیف سکیم پر اعتراض، سستا پیٹرول دینے سے انکار

پاکستان پیٹرولیم ڈیلرز ایسوسی ایشن (پی پی ڈی اے) نے حکومت کی جانب سے شروع کی گئی فیول ریلیف سکیم کے طریقہ کار پر شدید تحفظات کا اظہار کرتے ہوئے اس سکیم کے تحت پیٹرول کی فراہمی سے صاف انکار کر دیا ہے۔ کراچی میں ایک پریس کانفرنس سے خطاب کرتے ہوئے پی پی ڈی اے کے وائس چیئرمین انوار کمال نے موقف اپنایا کہ اس ریلیف سکیم کی تیاری کے دوران پیٹرولیم ڈیلرز کو اعتماد میں نہیں لیا گیا اور نہ ہی ان سے کوئی مشاورت کی گئی، جبکہ موجودہ طریقہ کار پر عمل درآمد کرنا ڈیلرز کے لیے انتہائی مشکل اور غیر عملی ہے۔

انوار کمال نے حکومت سے مطالبہ کیا کہ عوام کو براہِ راست، شفاف اور آسان طریقے سے ریلیف فراہم کیا جائے۔ ان کا کہنا تھا کہ ملک میں جاری شدید مہنگائی کے باعث ڈیلرز کا سرمایہ پہلے ہی سخت متاثر ہو چکا ہے، جبکہ آئل مارکیٹنگ کمپنیوں (OMCs) کے اربوں روپے کے واجبات بھی طویل عرصے سے زیرِ التوا ہیں۔ انہوں نے واضح کیا کہ اس ریلیف اسکیم کا تمام تر مالی بوجھ ڈیلرز پر ڈالنا کسی صورت ممکن نہیں، اس لیے ڈیلرز اپنے منافع (مارجن) میں اضافے کا بنیادی مطالبہ کر رہے ہیں اور موجودہ فارمولے کے تحت پیٹرول فراہم نہیں کریں گے۔

وائس چیئرمین پی پی ڈی اے نے سوال اٹھایا کہ حکومت کی جانب سے سستے پیٹرول کے بعد متبادل رقم ڈیلرز کو کس طریقہ کار اور کتنے عرصے کے اندر واپس ادا کی جائے گی؟ انہوں نے انکشاف کیا کہ اس مسئلے کے حل اور طریقہ کار کی وضاحت کے لیے گزشتہ تین دنوں سے سرکاری حکام سے مسلسل رابطہ قائم کرنے کی کوششیں کی جا رہی ہیں، لیکن تاحال حکومت کی جانب سے کوئی مثبت جواب یا ردِعمل موصول نہیں ہوا ہے۔