وزیراعظم شہباز شریف کی زیرِ صدارت پی ایم اسپیشل ریلیف اسکیم کا جائزہ اجلاس، فیول سبسڈی کے لیے سہولت ڈیسک قائم کرنے کی ہدایت

وزیراعظم محمد شہباز شریف کی زیرِ صدارت خلیج کی حالیہ صورتحال اور پٹرولیم مصنوعات کی عالمی قیمتوں میں اضافے کے پیشِ نظر کم آمدنی اور متوسط طبقے کو ریلیف کی فراہمی کے لیے ‘پی ایم اسپیشل ریلیف اسکیم’ کا ایک اعلٰی سطح کا جائزہ اجلاس اسلام آباد میں منعقد ہوا۔ اجلاس کے دوران اسکیم کے تحت موٹر سائیکل، رکشہ اور 800 سی سی تک کی گاڑیوں کے مالکان کو دی جانے والی فیول سبسڈی کی ملک گیر پیشرفت کا تفصیلی جائزہ لیا گیا۔ وزیراعظم نے عام شہریوں کے لیے سبسڈی کے پرامن اور آسان حصول کو یقینی بنانے کے لیے تمام پٹرول پمپس پر انتظامیہ، رضاکاروں اور عملے پر مشتمل ‘سہولت ڈیسک’ قائم کرنے کی سخت ہدایت جاری کی، تاکہ مستحق شہریوں کی بر وقت اور درست رہنمائی کی جا سکے۔

اجلاس کے دوران متعلقہ حکام نے بریفنگ دیتے ہوئے بتایا کہ اسلام آباد میں کامیاب پائلٹ پروجیکٹ کے بعد اب اس اسکیم کا دائرہ کار پورے ملک بشمول آزاد جموں و کشمیر اور گلگت بلتستان تک پھیلا دیا گیا ہے۔ انہوں نے بتایا کہ اسکیم میں رجسٹریشن کے عمل کو انتہائی سادہ اور عام فہم بنایا گیا ہے جس کے لیے صرف چار بنیادی معلومات— شناختی کارڈ نمبر، گاڑی کا نمبر، رجسٹریشن کا صوبہ اور رجسٹریشن کی تاریخ— درکار ہیں۔ اس کے علاوہ اسکیم کی تمام تر تفصیلات اردو ویب سائٹ (www.pmfuelrelief.pk) پر بھی فراہم کر دی گئی ہیں، جہاں کامیاب رجسٹریشنز کی تعداد میں مسلسل اضافہ ہو رہا ہے اور تمام صوبائی حکومتیں اس کے ملک گیر نفاذ میں پور تعاون کر رہی ہیں۔

وزیراعظم نے متعلقہ حکام کو ہدایت کی کہ عوام الناس میں اس ریلیف اسکیم کی جامع آگاہی اور درپیش مسائل کے فوری حل کے لیے تمام ادارے ہمہ وقت متحرک رہیں۔ اس اہم اجلاس میں نائب وزیراعظم و وزیر خارجہ محمد اسحاق ڈار، وفاقی وزراء احد خان چیمہ، عطاء اللہ تارڑ، شزا فاطمہ خواجہ، علی پرویز ملک، وزیر مملکت برائے خزانہ بلال اظہر کیانی اور معاون خصوصی طارق باجوہ سمیت دیگر اعلیٰ حکام نے شرکت کی۔