چین نے دنیا کا طاقتور ترین سپر کمپیوٹر بنا کر امریکا سے اعزاز چھین لیا

چین نے امریکی پابندیوں کے باوجود ٹیکنالوجی کی دنیا میں ایک بڑی کامیابی حاصل کرتے ہوئے دنیا کے طاقتور ترین سپر کمپیوٹر کا اعزاز امریکا سے واپس لے لیا ہے۔ عالمی درجہ بندی “ٹاپ 500” میں چین کے “لائن شائن” نامی سپر کمپیوٹر نے پہلی پوزیشن حاصل کی ہے، جسے ہواوے کی چپس، مقامی نیٹ ورکنگ آلات اور چینی سافٹ ویئر کی مدد سے مکمل طور پر مقامی سطح پر تیار کیا گیا ہے۔ چینی صدر کے اس قومی منصوبے کا مقصد یہ ثابت کرنا ہے کہ چین امریکی ہارڈ ویئر کے بغیر بھی جدید ترین ٹیکنالوجی تیار کر سکتا ہے۔

اس سے قبل یہ اعزاز امریکی سپر کمپیوٹر “ایل کیپٹن” (El Capitan) کے پاس تھا جو گزشتہ 18 ماہ سے دنیا کا تیز ترین کمپیوٹر تھا، تاہم “لائن شائن” نے 2.2 ایگزا فلاپس (Exaflops) فی سیکنڈ کی رفتار کے ساتھ امریکی کمپیوٹر کی 1.8 ایگزا فلاپس کی رفتار کو پیچھے چھوڑ دیا ہے۔ اگرچہ چینی چپس انفرادی طور پر امریکی چپس جتنی طاقتور نہیں ہیں، لیکن انہیں زیادہ مؤثر انداز میں مربوط کیا گیا ہے۔ البتہ، یہ سپر کمپیوٹر بجلی کی زیادہ کھپت رکھتا ہے اور یہ 42 میگاواٹ توانائی استعمال کرتا ہے، جو امریکی کمپیوٹر کے مقابلے میں تقریباً 40 فیصد زیادہ ہے۔ چین نے اس سے قبل آخری بار 2017 میں یہ اعزاز حاصل کیا تھا، مگر اس وقت کمپیوٹر میں غیر ملکی پرزے شامل تھے، جبکہ موجودہ کامیابی مکمل طور پر خود انحصاری کا منہ بولتا ثبوت ہے۔