ایپل اپنے صارفین کیلیے کیا چیز متعارف کرانے جا رہا ہے؟

کیلیفورنیا: دنیا کی معروف ٹیکنالوجی کمپنی ایپل (Apple) نے اپنے صارفین کے لیے ایک بڑی تبدیلی کا اعلان کیا ہے، جس کے تحت رواں برس سے امریکہ اور کینیڈا میں ‘ایپل میپس’ پر اشتہارات متعارف کرائے جائیں گے۔ کمپنی کے مطابق، اب میپنگ ایپلی کیشن پر کسی بھی جگہ کی تلاش کے دوران ‘آرگینک سرچ نتائج’ کے بالکل اوپر اسپانسرڈ (Sponsered) مواد یا اشتہارات دکھائے جائیں گے۔

اگرچہ ایپل نے ابھی تک اپنے اس نئے ایڈورٹائزمنٹ وینچر سے متوقع آمدنی کے اعداد و شمار ظاہر نہیں کیے ہیں، اور نہ ہی یہ بتایا ہے کہ اس کی ڈھائی ارب فعال ڈیوائسز میں سے کتنے صارفین باقاعدگی سے میپ سروس استعمال کرتے ہیں، تاہم ماہرین اسے کمپنی کی مالیاتی نمو کے لیے ایک اہم قدم قرار دے رہے ہیں۔

معروف تجزیہ کار گِل لاؤریا کا کہنا ہے کہ ایپل میپس میں اشتہارات کا اضافہ ایپل کے ‘سروسز بزنس’ (Services Business) کے لیے ایک بہترین موقع ثابت ہوگا۔ انہوں نے مزید کہا کہ چونکہ ایپل اپنے منافع کا ایک بڑا حصہ سروسز کے شعبے سے حاصل کرتا ہے، اس لیے یہ نیا اقدام کمپنی کی مجموعی آمدنی اور مارکیٹ گروتھ میں ایک اور مضبوط تہہ کا اضافہ کرے گا۔