ایپل اور ایمیزون کا معاہدہ، سیٹلائٹ کنیکٹیویٹی میں بڑی پیش رفت

ٹیکنالوجی کی دنیا کی دو بڑی کمپنیوں، ایپل اور ایمیزون کے درمیان ہونے والے ایک حالیہ اسٹریٹجک معاہدے نے سیٹلائٹ کنیکٹیویٹی کی دوڑ کو ایک نیا رخ دے دیا ہے۔ اس معاہدے کے تحت ایمیزون اب ‘گلوبل اسٹار’ کمپنی کے انتظامی معاملات کو کنٹرول کرے گا، جو فی الوقت ایپل کے آئی فون اور ایپل واچ صارفین کو ہنگامی سیٹلائٹ سروسز فراہم کر رہی ہے۔ ایمیزون اس شراکت داری کے ذریعے اپنے زیرِ تکمیل سیٹلائٹ نیٹ ورک “ایمیزون لیو” (Amazon LEO) کو مزید وسعت دے گا، جس کا بنیادی مقصد دور دراز علاقوں میں انٹرنیٹ کی فراہمی اور ایلون مسک کے ‘اسٹار لنک’ نیٹ ورک کا مقابلہ کرنا ہے۔

ایپل صارفین کے لیے خوش آئند بات یہ ہے کہ اس انتظامی تبدیلی کے باوجود ان کے آلات میں موجود سیٹلائٹ سروسز نہ صرف جاری رہیں گی بلکہ ایمیزون کے نئے اور جدید نظام کے ساتھ مربوط ہو کر پہلے سے زیادہ بہتر کارکردگی کا مظاہرہ کریں گی۔ ایمیزون کے عہدیدار پانوس پینے نے اس عزم کا اظہار کیا ہے کہ کمپنی عالمی سطح پر نیٹ ورک کی رسائی بڑھانے کے لیے پرعزم ہے۔ دوسری جانب، ایمیزون نے ہوائی جہازوں کے لیے بھی تیز ترین انٹرنیٹ نظام متعارف کرانے کا اعلان کیا ہے، جس کے لیے ڈیلٹا ایئر لائنز کے ساتھ معاہدہ طے پا چکا ہے اور یہ سروس 2028 تک شروع ہونے کی توقع ہے۔