مکہ مشترکہ دفاعی معاہدہ اسلامی دنیا کیلئے مثبت پیغام ہے: ترک صدر

ترک صدر رجب طیب اردوان نے کہا ہے کہ پاکستان، سعودی عرب اور ترکیہ کے درمیان طے پانے والا مکہ مشترکہ دفاعی معاہدہ پورے عالمِ اسلام کے لیے ایک مضبوط اور واضح پیغام ہے، جس کے آنے والے دنوں میں انتہائی مثبت اثرات مرتب ہوں گے۔ ترکیہ کے صوبے سامسن میں نوجوانوں کے ایک خصوصی پروگرام سے خطاب کرتے ہوئے ترک صدر نے بتایا کہ تینوں اہم اسلامی ممالک نے خطے کے امن و تحفظ کے لیے مشترکہ اقدام اٹھایا ہے اور اس حوالے سے پیش رفت انتہائی ہمت افزا ہے۔ انہوں نے اعتماد کا اظہار کیا کہ یہ مشترکہ حکمتِ عملی اپنے مقاصد میں ضرور کامیاب ہوگی۔

خطاب کے دوران ترک صدر نے مشرقِ وسطیٰ اور خلیجی خطے کی سیکیورٹی صورتحال پر تشویش کا اظہار کرتے ہوئے کہا کہ ان کی حکومت آبنائے ہرمز اور خلیج کے دیگر حصوں میں درپیش سنجیدہ نوعیت کی مشکلات و چیلنجز پر باریک بینی سے نظر رکھے ہوئے ہے۔ رجب طیب اردوان نے واضح کیا کہ ان مسائل کو معمولی نہیں سمجھا جا سکتا۔ انہوں نے اعادہ کیا کہ ترکیہ اسلامی دنیا کو درپیش سیکیورٹی و معاشی چیلنجز سے نمٹنے کے لیے اپنا کلیدی اور مصالحتی کردار ادا کرتا رہے گا تاکہ خطے میں پائیدار امن اور استحکام قائم ہو سکے۔