آئین پاکستان تمام شہریوں کے بنیادی حقوق کا محافظ ہے: وزیراعظم کا یوم جمہوریہ پر پیغام

پاکستان سمیت دنیا بھر میں آج عالمی یومِ جمہوریت منایا جا رہا ہے۔ اس موقع پر اپنے خصوص پیغام میں وزیراعظم محمد شہباز شریف نے جمہوری اقدار، مساوات، انصاف اور قانون کی بالادستی سے وابستگی کا اعادہ کرتے ہوئے کہا ہے کہ آئینِ پاکستان تمام شہریوں کے بنیادی انسانی حقوق کا حقیقی محافظ ہے۔ انہوں نے تاکید کی کہ جمہوری نظام میں حکومت کے تمام اختیارات عوام کے منتخب نمائندوں کے ذریعے عوامی فلاح و بہبود کے لیے استعمال ہوتے ہیں اور پارلیمان ملک میں عوام کی مکمل نمائندگی کرنے والا مرکزی جمہوری ادارہ ہے۔

وزیراعظم نے آئین کے آرٹیکل 25 کا حوالہ دیتے ہوئے کہا کہ پاکستان کا آئین تمام شہریوں کے مساوی حقوق اور قانون کی نظر میں برابری کی ضمانت فراہم کرتا ہے۔ انہوں نے اس بات پر بھی زور دیا کہ آئینِ پاکستان قومی زندگی کے تمام شعبوں میں خواتین کی بھرپور شمولیت کو یقینی بناتا ہے، جبکہ وفاقی و صوبائی قانون ساز اداروں میں خواتین اور اقلیتوں کے لیے مخصوص نشستیں ان کی مؤثر نمائندگی کا ثبوت ہیں۔ وزیراعظم شہباز شریف نے اقوامِ متحدہ کے پائیدار ترقیاتی اہداف (SDGs) کے تحت جمہوری اصولوں، امن اور مضبوط اداروں کے قیام کے عزم کا اعادہ کرتے ہوئے قوم پر زور دیا کہ وہ بہترین پارلیمانی روایات کی پاسداری اور ایک خوشحال مستقبل کی تعمیر کے لیے متحد رہیں۔