پنجاب حکومت نے سہیل آفریدی کو سکیورٹی فراہم کر کے ذمہ داری کا ثبوت دیا: سلمان رفیق

صوبائی وزیر و چیئرمین کابینہ کمیٹی برائے امن و امان خواجہ سلمان رفیق نے اپنے ایک بیان میں کہا ہے کہ حکومتِ پنجاب نے وزیراعلیٰ خیبر پختونخوا سہیل آفریدی کو صوبے میں آمد پر مکمل سیکیورٹی فراہم کر کے ایک ذمہ دار حکومت ہونے کا ثبوت دیا ہے۔ انہوں نے کہا کہ پنجاب حکومت اور پولیس نے بارہا کے پی حکومت اور ان کے عملے سے روٹ اور سفری تفصیلات طلب کیں لیکن ان کی جانب سے کوئی تعاون نہیں کیا گیا، جبکہ سہیل آفریدی کی نازیبا اور غیر پارلیمانی گفتگو کے باوجود پنجاب پولیس نے اپنی ذمہ داری احسن طریقے سے نبھائی۔

خواجہ سلمان رفیق نے شدید تنقید کرتے ہوئے کہا کہ وزیراعلیٰ کے پی کے غیر منصوبہ بند دورے اور ہنگامہ آرائی کے باعث شہری سارا دن شدید مشکلات کا شکار رہے اور مریض ایمبولینسز میں پھنسے رہے، جس پر سہیل آفریدی کو عوام سے بلا تاخیر معافی مانگنی چاہیے۔ انہوں نے مزید کہا کہ سہیل آفریدی اپنے گارڈز کے ساتھ پولیس کی گاڑی پر سیر و تفریح کرنے کے بعد فٹ پاتھ پر بیٹھ گئے، تاہم عوام نے ان کے اس رویے کو یکسر نظر انداز کر دیا۔ انہوں نے واضح کیا کہ پنجاب حکومت قانون کی بالادستی اور ضوابط کی پابندی پر مکمل یقین رکھتی ہے۔