تیل کی قیمتوں کو کنٹرول کرنا اب ممکن نہیں رہا: ایرانی سپیکر

ایرانی پارلیمنٹ کے اسپیکر محمد باقر قالیباف نے کہا ہے کہ عالمی منڈی میں تیل کی قیمتوں کو اب قابو میں رکھنا کسی کے لیے بھی ممکن نہیں رہا۔ تہران میں صحافیوں اور تجارتی نمائندوں سے گفتگو کرتے ہوئے اسپیکر ایرانی پارلیمنٹ نے کہا کہ امریکہ نے عالمی منڈی میں تیل کی قیمتوں کو مصنوعی طور پر کم رکھنے کے لیے ہر ممکن طریقہ استعمال کیا، جس میں مارکیٹ کے بنیادی اصولوں میں مداخلت اور گمراہ کن خبریں پھیلانا شامل تھا، تاہم اس کی تمام کوششیں ناکام ہو چکی ہیں۔

باقر قالیباف نے مزید کہا کہ امریکہ نے توانائی کی قیمتوں میں اضافے کو روکنے کے لیے اپنے قومی سٹریٹجک ذخائر سے بھی بڑی مقدار میں خام تیل جاری کیا، لیکن ان تمام تر اقدامات کے باوجود عالمی سطح پر تیل کی قیمتوں میں مسلسل اضافہ ہو رہا ہے۔ ان کا کہنا تھا کہ عالمی تیل کی منڈی اب ایک نئے اور ناقابلِ اندازہ مرحلے میں داخل ہو چکی ہے، جہاں روایتی مغربی دباؤ اور تزویراتی اقدامات بے اثر ثابت ہو رہے ہیں۔