جمہوریت کی کامیابی کیلئے قانون کی عملداری بنیادی امر ہے: مریم نواز

وزیراعلیٰ پنجاب مریم نواز شریف نے عالمی یومِ جمہوریت کے موقع پر اپنے خصوصی پیغام میں کہا ہے کہ جمہوریت کی حقیقی کامیابی کے لیے باشعور عوام، دیانتدار قیادت اور قانون کی بلاامتیاز عملداری بنیادی شرط ہے۔ انہوں نے واضح کیا کہ عالمی یومِ جمہوریت منانے کا بنیادی مقصد جمہوری اقدار کی اہمیت کو اجاگر کرنا ہے، کیونکہ جمہوریت محض ایک سیاسی نظام کا نام نہیں بلکہ یہ ملکی ترقی و خوشحالی میں عوام کے فعال اور مسلسل کردار کا ایک لامتناہی عمل ہے جس کا حتمی مقصد ایک متوازن فلاحی معاشرے کا قیام ہے۔

وزیراعلیٰ نے احتساب کو جمہوریت کا اہم ستون قرار دیتے ہوئے کہا کہ حکومتِ پنجاب کرپٹ عناصر کے مکمل خاتمے کے لیے پرعزم ہے اور اس سلسلے میں صوبے بھر میں کرپشن کے سدباب کے لیے ایک منظم مہم جاری ہے۔ انہوں نے زور دیا کہ آئین کی بالادستی ہی جمہوریت کی اصل روح ہے، جبکہ جمہوری روایات کے فروغ اور استحکام کے لیے سول سوسائٹی اور اداروں کا فعال ہونا کلیدی حیثیت رکھتا ہے۔

مریم نواز شریف کا مزید کہنا تھا کہ جمہوری اقدار کو جلا بخشنے کے لیے باہمی برداشت، مفاہمت اور پارلیمانی روایات کا تسلسل ناگزیر ہے۔ انہوں نے اس بات کا اعادہ کیا کہ جمہوریت ہی وہ واحد راستہ ہے جس پر گامزن ہو کر ملک سیاسی، معاشی اور سماجی استحکام کی منزل حاصل کر سکتا ہے۔